বেটুপাত

বেটুপাত

Wednesday, 26 December 2018

নাটঘৰ আৰু প্ৰহেলিকা (ৰশ্মীৰিয়া গগৈ ডেকা)

নাটঘৰ আৰু প্ৰহেলিকা
_____________________

                    (দৃশ্যপট ১)
ডঁৰিকণা সপোনেৰে আকাশ জিনিব খোজা
হেঁপাহটোৰ আয়ুস আৰুনো কিমান দূৰ
আশাবোৰৰ বয়স বুটলি বুটলি
ভীষণ ভাগৰুৱা এতিয়া মই.....।

                  (দৃশ্যপট ২)
বৰফৰ ওঁঠদুটিক মৌনতাৰ পঘাডালে সী থৈ
নিৰুদ্দিষ্ট ভৱিষ্যৎৰ প্ৰহেলিকা খেদি
'বাঁও চকু লৰাৰ' মিছা প্ৰবোধেৰে
ঢেঁকীয়া ফুলীয়া ৰংবোৰ ৰ'দাই ৰ'দাই থঁও।

                 (দৃশ্যপট ৩)
পালতৰা নাঁওখনৰ টিঙত বহি বহি
পানীৰঙী এপিয়লা জোনাকত
ডুব যোৱাৰ হাবিয়াস এৰা নাই এতিয়াও
পাৰ-ঘাটত নাঁও বান্ধি বুকুত ওলমাওঁ
হেলোজেনৰ হাজাৰ সমদল....।

               (দৃশ্যপট ৪)
মাটিৰ মানুহৰ ভাও লৈ অৱসাদ এই জীৱনৰ
আঁত হেৰুৱাই যৱনিকালৈ কিমান বাট
সেইয়া মই নেজানো,
অলেখ ধূমকেতুৰ মাজত সূৰ্য বিচাৰি ফুৰা
ডঁৰিকণা সপোনটোৰ ভগ্নাংশ যোৰাই যোৰাই
ছঁয়াময়া কৈ দেখো,নেপথ্যত সেইয়া কোন???

________________0__________________
 ৰশ্মীৰিয়া গগৈ ডেকা
কাৰ্বি আংলং ডিফু।

No comments:

Post a Comment